Dit is alles klaar.  Dit is nou die trekstorie.  Alles in sy plek –  radio, ketel, rekenaar, drukkers, ensovoorts.  Goed, Telkom het nog nie gekom nie.  Hulle SMS darem dat hulle gaan kom.  Net so voor Kersfees reken ek.  *Sug*

Die krieket is vir baie mense ook klaar.  Wat ‘n teleurstelling.  Maar so gaan dit.  Ek het stil duim vasgehou, maar dit was egter tong-in-die-kies.   Nou wonder ek of ek ooit die voorreg gaan hê om ‘n krieket- of sokkerwêreldbeker in ons silwerwarekas te sien.  *nog ‘n sug*

Die werksweek is amper klaar.  Ek kan nogal gewoond raak aan ‘n vierdagwerksweek.  *’n groot glimlag*

My broer se kinders het vanoggend op ‘n bus wakker geword iewers in die Noord-Kaap en ek kan nie wag om die tweetjies te sien nie.  Ek het gister weer ‘n beriggie oor Sheldean Human se vermeende moordenaar gelees.  Dit is erg hartseer dat so pragtige kindjie nie vry en vrolik groot kon word nie.  Die foto hierby is deur my broer geneem en dit is hoe ons Chrissie is – ‘n huppelkind! 

Die oueraand by die skool is ook klaar. *baie groot glimlag*  Ek was nie lus om te gaan nie, maar my seun dring baie ernstig aan daarop.  Mens staan in sulke oneindige rye (of so voel dit) om vir 3 minute met die onderwyser te praat net om, in Kevin se geval, te hoor dat daar geen probleme is nie en dat Kevin “mature and intelligent and a pleasure in class” is.  Is Kevin egosentries dat hy die goed wil hoor?  Toe hy vra wat sê die onderwysers, het ek net geantwoord dat hulle sê hy praat te veel.  Dit het hom frustreer, maar ek het hom darem verlos van sy nuuskierigheid.  *nog ‘n groot glimlag*  Ek is trots op die mannetjie.  Ek hoef nie agter hom te staan oor sy skoolwerk nie.  Ek moes net al baie laat in die aand help met take wat op die nippertjie klaarkom.  Kevin is soort van ‘n “adrenalienjunkie” en ek raak grys daardeur. 

Kevin is in Fairbairn College, ‘n skool met mooi tradisies en ‘n geskiedenis van goeie prestasies op akademiese gebied.  Hulle spog graag met hulle suksesverhale.  In die portaal hang vele toekennings as een van die topskole in die Weskaap en daar hang ‘n nuwe “tribute”.  My selfoon se kamera is nie baie waffers nie en dit is jammer dat die kwaliteit nie goed is nie, maar hier is dit.  Dit is Ryan Ten Doeschate wat in 1998 aan Fairbairn College gematrikuleer het en hierdie jaar vir Holland in die krieket wêreldbeker uitgestap het.  Hy het nogal glad nie sleg gespeel nie.  Net jammer sy span was so vroeg in die toernooi klaar. 

Nou ja, dan maak ek nou maar ook klaar vir eers .  En ek wens julle ‘n vreeslike lekker naweek toe!