Wow!  Wat ‘n skare.  Kon nie help om ‘n knop te sluk nie.  Wat ‘n toespraak. Kon nie help om verwonderd te luister nie.  Wat ‘n persoonlikheid.  

Dit is jammer dat hy in een van die moeilikste tye ooit die leisels moet oorneem, want hy sal voortdurend onder erge kritiek deurloop.  Ek is egter bly dat ‘n oënskynlike sterk kandidaat die leisels juis nou oorneem.  Uit die opkoms by stemlokale verlede jaar en die inhuldiging vandag, lyk dit of die Amerikaners self baie hoop het met die verandering. 

Ek hou niks van Amerika en sy politiek nie.  Dit is egter so dat as dit goed gaan daar, gaan dit beter hier en in die res van die wêreld.  Mag dit onder die man se hande gou beter gaan.  Vanaand, toe hy sê God Bless America, toe las ek saggies agteraan en “die res van ons”.  

Op ‘n ander noot….

Ek wonder of Bleskop ooit hier sal lees.  Dit is nou Bleskop wat besigheid het in High Street.  Jong ou, ek hou jou dop.  Daardie stompie wat jy so doodluiters by die venster uitgegooi het, kan jou ‘n paar rand in boete kos. En die rooi robot waaroor jy so blatant gery het (dit het na rooi oorgeslaan terwyl jy nog agter die wit streep gestaan het), kan jou eendag jou lewe of iemand anders s’n kos.  Met so nommerplaat soos joune sou ek liewer nie kanse vat nie.  Al daai kanse vat kom eendag terug en hap jou op ‘n sagte plek. Pasop.