Daar’s klaar gedans….

Nou is dit al die pad skouer aan die wiel en afdraende pad…

Dankie tog. Daar is net een ding wat erger is as ‘n dogter in matriek en dit is ‘n seun in matriek so net voor die matriekafskeid. My ou het gestres oor twintigduisend dinge wat volgens hom verkeerd kon gaan en die stres oorgeplaas na ma toe. Ek was snaarstyf opgewen en aan die einde van die dag was alles heel gaaf. Die meisie was in haar noppies met haar blom en baie tevrede dat die Jaguar (1976) se kleur nogal ingeskakel het by die uitrustings.

Daar is nie afterparty toe gegaan nie. Die man is al rustig aan die slaap. My spiere begin nou eers behoorlik ontknoop.

Ek is bly die skool se afskeid is so vroeg in die jaar oor en verby. Nou kan daar gefokus word op die eksamens wat voorlê en die obesessie oor motors, haarstyle, uitrustings en metgeselle is uit die pad.  

Ek is ‘n baie trotse ma….

 

Alweer aan’t speel met Photoshop

Ek speel weer met Photoshop – dit is mos langnaweek.  llana se vriendin het ‘n fantastiese foto geneem van die bruid.  Die beligting is egter bietjie donker en die agtergrond baie besig. Ek het met die foto gespeel en is heel ingenome met die resultaat sover.  Ek moet nog bietjie toor aan die rooi hand en dan is die groot toets die drukslag.  Dit is lekker om weer ‘n slag regtig tyd te hê vir my gunsteling tydverdryf.  Ek kom net agter dat ek al meer my bril hiervoor nodig het… 

Stillerig…

Ek is maar bietjie stillerig. Een, ek is te besig met werk; as ek uiteindelik agter die rekenaar inskuif vir opvang, lees ek die blogs wat ek volg deur readomatic tot ek voel hoe my oë begin toeval en dan duik ek deur ‘n watertjie tot by my kussing. Twee, ek het niks om te sê wat nie klaar gesê is nie. My drafts lê net so ongepubliseer omdat dit oor sake van die tyd is wat reeds van alle kante bekyk is nie meer relevant is nie.  So, ons gaan stem op stemdag en ons het ‘n idee wat die uitslag sal wees net soos die skrif lankal teen die muur was oor die Z u m a aangeleentheid. Ou nuus. Sat gesels. Drie, ek speel op Sanlam iTrade met virtuele aandeleverhandeling en ek verwyl nogal baie tyd om my oog op die mark te hou in enige spaar minute wat ek het.

Ek is een van daardie supergebruikers van sagteware en allerhande applikasies. Amper soos mans met hulle “gadgets”. Uit die aard van my werk is tydsbestuur en ‘n dagboek my twee beste maats. Nou moet ek bieg oor die dagboekstorie…. ek skryf nie altyd my afsprake in die tradisionele een neer nie. Want sien, terwyl ek op die telefoon besig is om die afspraak te maak, is ek lankal besig om in Outlook (die werk se voorskrif) die afspraak te skeduleer en die ander persoon in te sluit vir ‘n e-pos uitnodiging …. soos dit ‘n goeie georganiseerde gebruiker sal betaam…. en dan word my aandag afgetrek met iets anders en ek vergeet om die afspraak aan te teken in die papierweergawe wat soos gewoonlik nog in my aktetas lê en my rekenaar by die werk en my rekenaar by die huis staan los van mekaar. Hier kom wonderlike Google in. Goed, ek is seker daar is sekerlik ander produkte en applikasies wat in ander se oë wonderlik en cool en alles is.  Ek is ‘n Google junkie.

Ek gebruik ‘n Gmail adres vir my privaatkorrespondensie. En ek gebruik Google se Kalender. Dit is wat my aanbetref my saving grace. Ek gebruik die sinkroniseerder wat my werkskalender met my Google kalender sinkroniseer en dan gebruik ek Google se kalender om my te herinner van my afsprake en notas. Sien, mens kan jou Google kalender stel om daagliks vroegoggend vir jou die dag se agenda per e-pos te stuur en die kalender kan gestel word om vir jou SMS’e te stuur – gratis (ek weet, ek gebruik dit al maande). Ek het dit as standaard gestel dat ek twee SMS’e ontvang – een 12 ure voor die afspraak en een 1 uur voor die afspraak. Dit kan natuurlik per afspraak verander word. Daardie een wat 1 uur voor die volgende afspraak is, het my bas al gered omdat die sagte biep van my selfoon duidelike bevestiging is dat ek moet klaarmaak waarmee ek besig is en in die pad moet val vir die volgende afspraak. Die tipiese SMS lees “Reminder: XXXXX @ Fri Apr 10 09:30 – 10:00 in XXXXXX.  Ek skeduleer my belangrikste take ook sommer as “afsprake” voor kantoorure sodat ek daarvoor ook SMS’e kan kry.  

Ek kan natuurlik my selfoon se kalender gebruik, maar ek soek altyd die vinnigste en korste pad om ‘n ding gedoen te kry.  Ek hou van kontrole en ek is ‘n voorstander van papierloos werk.  Ek is ook maar bietjie vergeetagtig… die selfoon se kabel is maar net nooit in my tas as hy daar moet wees nie en ek verpes die trippeltik op ‘n sel.

Sinkronisasies tussen my Outlook- en Google kalenders vind outomaties elk 60 minute plaas  en as ek saans agter my rekenaar by die huis inskuif, sinkroniseer ek weer tussen my Google kalender en Outlook op my tuisrekenaar. Dit is dan wanneer ek tog maar die papierdagboek nader sleep om seker te maak alles is ingeskryf. Want die werk wil dit hê.  Ek wens ek kon ook vir daardie een net die “sync” knoppie druk en ‘n paar sekondes later is als gedupliseer.  

Nou wil ek nog net daardie oulike gadget koop wat mens in jou motor gebruik om jou ritte te monitor… ek het gesien hoe vinnig en maklik ‘n kollega, wat die gadget gebruik, met sy ritboek klaarspeel vir Jan Taks…. As ek dit het, dan is ek heeltamaal “sorted”. Hoop die kinders lees hier voor ek weer verjaar….